Beth yw Cofrestr Rhoddwyr Organau'r GIG?

English

Mae Cofrestr Rhoddwyr Organau’r GIG yn gofnod cyfrinachol o benderfyniad pobl ynglŷn â rhoi organau.

Mae’n cofnodi eich dewis i fod yn rhoddwr organau ai peidio pan fyddwch chi’n marw.

Gallwch chi hefyd ei defnyddio i enwebu rhywun i wneud penderfyniad ar eich rhan ynglŷn â rhoi organau.

Ar y dudalen hon

Pam cofrestru? Gwybodaeth am Gofrestr Rhoddwyr Organau'r GIG

Pam ddylech chi gofrestru penderfyniad ynglŷn â rhoi organau?

Pan fyddwch chi’n cofrestru eich penderfyniad ynglŷn â rhoi organau, rydych chi’n helpu eich anwyliaid i wybod beth rydych chi ei eisiau.

Dim ond gyda chefnogaeth eich teulu y bydd rhoi organau yn digwydd, ac ni fydd clinigwyr yn bwrw ymlaen â rhoi organau os bydd eich teulu neu’ch anwyliaid yn gwrthwynebu.

Os byddwch chi’n gallu bod yn rhoddwr organau yn y dyfodol, bydd nyrs arbenigol yn edrych ar Gofrestr Rhoddwyr Organau’r GIG i weld a oeddech chi wedi cofnodi penderfyniad ac wedi trafod hyn gyda’r bobl agosaf atoch chi.

Heb eich penderfyniad chi i’w helpu, efallai na fydd eich anwyliaid yn siŵr beth i’w wneud.

Gweithredwch nawr i achub bywydau yn y dyfodol.

Cael mwy o wybodaeth

Ein hymrwymiad i ffydd a chredoau

Os byddwch chi’n cofnodi penderfyniad i roi eich organau, byddwch chi hefyd yn cael cyfle i ddweud a fyddech chi’n hoffi i staff y GIG siarad â’ch teulu ac unrhyw berson priodol arall am sut mae rhoi organau yn gallu cyd-fynd â’ch ffydd neu’ch credoau.

Rydym ni wedi ymrwymo i gefnogi eich ffydd a’ch credoau drwy gydol y broses o roi organau neu feinwe.

Os byddwch chi’n marw, byddwn ni’n dweud wrth eich teulu bod eich ffydd a’ch credoau yn bwysig i chi, byddwn ni’n cefnogi eich teulu i siarad â’ch arweinydd ffydd neu gynrychiolydd o’ch system gred, ac yn darparu gwybodaeth i gefnogi’r trafodaethau.

Rhagor o wybodaeth am Gofrestr Rhoddwyr Organau'r GIG

Does neb yn cael ei ychwanegu'n awtomatig at restr

Oni bai eich bod chi’n cofnodi eich penderfyniad ar Gofrestr Rhoddwyr Organau’r GIG, ni fydd gennym ni unrhyw fanylion amdanoch chi na’ch dewisiadau.

Rydym ni’n annog pawb, p’un ai ydyn nhw am roi organau ai peidio, i ychwanegu eu hunain at Gofrestr Rhoddwyr Organau’r GIG er mwyn cofnodi eu penderfyniad.

Os nad ydych chi wedi cofnodi penderfyniad ynglŷn â rhoi organau ac nad ydych chi yn un o’r grwpiau sydd wedi’u heithrio, y man cychwyn ar gyfer oedolion yng Nghymru a Lloegr yw y dylai rhoi organau fynd yn ei flaen. Caniatâd tybiedig yw'r enw am hyn. Efallai y byddwch chi hefyd ei glywed yn cael ei alw’n system ‘optio allan’ ar gyfer rhoi organau.

Gallwch chi ddewis o hyd a ydych chi eisiau rhoi organau pan fyddwch chi’n marw ai peidio drwy gofnodi eich penderfyniad a siarad â’ch teulu.

Mae systemau rhoi organau gwahanol ar waith ar draws gwahanol wledydd y Deyrnas Unedig. Cael gwybodaeth am y gyfraith rhoi organau yng Nghymru

Gall unrhyw un gofrestru penderfyniad

Gall unrhyw un sy’n byw yn y DU, Ynysoedd y Sianel neu Ynys Manaw gofrestru penderfyniad ar Gofrestr Rhoddwyr Organau’r GIG, does dim terfyn oedran, a gall rhieni gofrestru eu plant.

Nid yw cael salwch neu gyflwr meddygol yn eich atal rhag cofrestru eich penderfyniad i roi organau, ac mae gweithwyr gofal iechyd proffesiynol arbenigol yn penderfynu ym mhob achos unigol a yw organau a meinwe’n addas i’w rhoi.

Cael rhagor o wybodaeth am bwy sy’n cael rhoi

Os nad ydych chi am benderfynu eich hun a ydych chi am roi organau, gallwch chi enwebu rhywun i benderfynu hynny ar eich rhan os byddwch chi’n marw.

Enwebu cynrychiolydd nawr

Beth sy’n digwydd pan fyddwch chi’n cofrestru penderfyniad

Pan fyddwch chi’n cofrestru eich penderfyniad ar roi organau:

Byddwn ni’n ychwanegu eich manylion a’ch penderfyniad at Gofrestr Rhoddwyr Organau’r GIG
Byddwn ni’n anfon llythyr atoch chi’n cadarnhau hyn o fewn 10 diwrnod
Dylech chi siarad â’ch teulu, a gwneud yn siŵr eu bod yn gwybod beth rydych chi eisiau ei wneud

Y Cerdyn Rhoi Organau

Rydym ni’n anfon Cerdyn Rhoi Organau at bawb sy’n cofrestru i roi am y tro cyntaf.

Gallwch chi hefyd lwytho’r Cerdyn Rhoi Organau i lawr, sy’n eich galluogi i rannu eich penderfyniad yn syth.

Ewch i hyb yr ymgyrch i lwytho Cerdyn Rhoi Organau Cymraeg i lawr

Ni fyddwn ni’n anfon cerdyn rhoi newydd atoch chi os byddwch chi’n newid eich manylion, yn ailgofrestru neu’n optio allan.

Os ydych chi wedi colli eich cerdyn rhoi ac eisiau cael cerdyn newydd, gallwch chi argraffu eich cerdyn rhoi organau eich hun.

Ewch i hyb yr ymgyrch i lwytho Cerdyn Rhoi Organau Cymraeg i lawr i’w argraffu gartref

Fel arall, cysylltwch â’r Llinell Rhoi Organau ar 0300 123 23 23. Rydym ni ar agor 24 awr y dydd, saith diwrnod yr wythnos.

Gallwch chi newid eich meddwl

Gallwch chi newid y penderfyniad rydych chi wedi’i gofrestru ar unrhyw adeg.

Os ydych chi wedi cofnodi penderfyniad ynglŷn â rhoi organau ar Gofrestr Rhoddwyr Organau’r GIG ac eisiau diweddaru eich manylion, neu newid neu gadarnhau eich penderfyniad, gallwch lenwi’r ffurflen Newid eich manylion neu ffonio 0300 123 23 23.

Byddwn ni’n cyfateb eich manylion a’ch penderfyniad gyda’ch cais blaenorol ac yn anfon llythyr atoch chi i gadarnhau unrhyw newidiadau.

Beth sy’n digwydd os nad ydych chi’n cofrestru penderfyniad

Os nad oes cofnod o’ch penderfyniad ar Gofrestr Rhoddwyr Organau’r GIG, ac nad ydych chi yn un o’r grwpiau sydd wedi’u heithrio, bydd yn cael ei ystyried yng Nghymru a Lloegr eich bod chi’n cytuno i roi eich organau pan fyddwch chi’n marw. Bydd disgwyl i’ch teulu gefnogi hyn.

Mae systemau rhoi organau gwahanol ar waith ar draws gwahanol wledydd y Deyrnas Unedig. Cael gwybodaeth am y gyfraith rhoi organau yng Nghymru

Bydd nyrsys arbenigol bob amser yn siarad â’ch teulu os yw rhoi organau’n bosibilrwydd, felly siaradwch â’ch teulu am eich penderfyniad a rhoi’r sicrwydd sydd ei angen arnyn nhw i gefnogi’r penderfyniad hwnnw.

Ydych chi wedi cofrestru eich penderfyniad rhoi organau?

Mae’n cymryd dwy funud i gofrestru eich penderfyniad ar-lein.

Gweld y dewisiadau y gallwch eu gwneud

I gofrestru dros y ffôn, ffoniwch ni ar: 0300 123 23 23.

Mwy o wybodaeth

Oes gennych chi unrhyw gwestiynau neu bryderon?

Cyrchwch y ffeithiau y tu ôl i gamdybiaethau cyffredin ynghylch rhoi organau a threfniadau angladd, ffydd a chredoau, y system optio allan, cyfranogiad teulu a mwy.

Cyrchu’r ffeithiau yn awr